مقدمة في قواعد البيانات
السلام عليكم ورحمة الله وبركاتة
الكثير منا يعرف برنامج الاكسس وانه من ضمن حزمة الاوفيس زي الاكسيل والورد والبوبوينت .... الخ
ولكن القليل منا يعرف يتعامل معه بشكل جيد والكثير يفضل برنامج الاكسيل لسهولة التعامل معه وايضا لتوفر المعلومات الكاملة
ايه رأيكم نبدأ مع بعض نتعلم برنامج الاكسس ونتعرف بشكل منظم ايه هو الاكسس وهو هيفدنى في ايه وازاى اتعلمه بدون صعوبة
وهل هو يمكن استخدامه دون الرجوع الى برنامج الاكسيل ولا لازم استخدم الاثنين مع بعض واذا كان يمكن استخدام الاثنين مع بعض
ايه هى الطريقة اللى يمكن ربط البرنامجين مع بعض ،
علشان ماطولش عليكم تعالوا نتعرف على ايه هو برنامج الاكسس وايه هى فوايده وبيتكون من ايه بشكل مختصر
هسألك سؤال : لو انت شغال في شركة او مدرسة او اى مؤسسة سواء حكومية او خاصة ايه الطريقة اللى انت بتعملها علشان تجمع
بها بياناتك ؟ هقولك انت بتعمل ايه ، انت بتعمل دورة مستندية أو بيكون فيه دورة مستندية موجودة مسبقا وطبعا بيتم تسجيل البيانات
فيها بشكل يومى او حسب الحاجة لتسجيل البيانات ، ولكن المشكلة انك لما بتحاول تجمع البيانات بتلاقى صعوبة شوية وبالتالى بتجتاج
برنامج يجمعلك البيانات دى في مكان واحد ، هو دا اللى انا عايز أوصلك ليه
أولا ايه هى البيانات : البيانات هى جزء من المعلومات يعنى ايه ؟ يعنى البيانات لوحدها مش هتعرف تستفاد منها بشكل مستقل
يعنى لوافترضنا انه عندى بيان بأسماء الموظفين فقط زى اسم محمد او أحمد أو خالد .... الخ ايه اللى استفدته دلوقتى ولا حاجة
طيب لو ااضفنا للاسم الوظيفة مثلا محمد وظيفته مدير اصبحت دلوقتى معلومة ومحمد يعتبر بيان ووظيفة محمد " مدير " بيان ايضا
السؤال الثاني : ازاى اجمع البيانات مع بعضها ؟ وهو دا المهم . هسألك سؤال هو انت لما تكون عايز تحفظ اى مستند بتعمل ايه؟
طبعا هتقولى بحفظها في فايل وبيكون مصنف يعنى مثلا اسماء الموظفين في ملف والاجازات في ملف والاعمال اليومية في ملف ...الخ
هو دا بالضبط اللى عايزك تعرفه انك بتحتاج الى دولاب تحفظ فيه الملفات والملفات بيكون فيها المستندات المصنفة
الدولاب دا بيتسمى قاعدة البيانات والملفات تسمى جداول البيانات
ولكن فين بقى المعلومات ؟ المعلومات هى التقارير اللى بجمعها من داخل الملفات " المستندات "
تعال بقى للسؤال الثالث والمهم ايه هو برنامج الاكسس؟ وايه علاقته بالكلام اللى انت بتقوله؟
برنامج الاكسس يعتبر برنامج قواعد بيانات فيه دواليب وملفات ومستندات
طيب ايه الجديد وايه الفرق بينه وبين الدواليب والملفات والمستندات اللى معانا !!!
الفرق انه أولا: بيستخلص المعلومات بشكل اسرع وفى وقت أقل
ثانيا : بينظم البيانات وبيعرضها بأشكال مختلفة
ثالثا : مشاركة البيانات مع الاخرين مثل البريد الالكترونى والانترنت
رابعا : عمليه الاضافة والحذف والتعديل للبيانات
الى هنا تنتهى معلومة اليوم
انتظرونا .......
الحلقة القادمة مقدمة تاريخية عن قواعد البيانات
1- مقدمة فى قواعد البيانات- معكم فيها - م/عبجالجيد محمد
