السلام عليكم ورحمة الله وبركاته
النهاردة هشرح درس بسيط
وهو ايضاح أوجه التشابه والاختلاف بين الخاصيات ( Value, Value2, Text)
ثلاثتهم مهمتهم استخراج القيم وفى حالة عدم اختيار احدهم فتعتبر الخاصية Value هى الافتراضية
تعالوا كدا نكتب سوا فى ورقة العمل بيانات لاختبارها كالتالى
B |
A |
|
Eslam |
Value |
1 |
Eslam |
Value2 |
2 |
Eslam |
Text |
3 |
كتبنا البيانات طيب تعالوا نروح للنافذة الفورية واللى مش عارف يوصل للخميرة الفورية
يروح لمحرر الاكواد بالضغط على Alt+F11 وبعدين يضغط Ctrl+G
على طول هتظهر فوزية قصدى النافذة الفورية ايوه هية نافذة Immediate دى
طيب تمام تعالوا نكتب كدا كود فى النافذة عشان نشوف نتائج البيانات اللى كتبناها فى ورقة العمل من شوية دى
نكتب سوا الكود دا
CODE
?Range("B1").value & ", " & Range("B2").value2 & ", " & Range("B3").Text
ومحدش يقولى ايه علامة الاستفهام دى لانها مشروحة فى دورة افتح الباب لاستاذنا الغالى ياسر خليل وعشان مدوخش حد الموضوع من هنا
طيب الكود دا واضح وضوح الشمس يظهر الموجود بالخلايا B1 و B2 و B3 ويفصلهم علامة الفاصلة تلك ,
طيب جميل قول ياعم جميل ، دلوقتى بعد كتابة الكود دا والضغط Enter هنلاقى الناتج 3 اسلام جنب بعض زى ما فى الصورة كدا
حمادة بيقولى انت بتضحك علينا ما النواتج كلها شبه بعض ، ياعم حمادة لو صبر القاتل على المقتول ، الله اعلم ممكن ميموتش دا فى علم الغيب
المهم دلوقتى نروح نغير البيانات كدا فى ورقة العمل عشان نبدا نلاحظ الاختلاف واكتبوا البيانات اللى قدامكم دى
B |
A |
|
12345.67 |
Value |
1 |
12345.67 |
Value2 |
2 |
12345.67 |
Text |
3 |
كتبت البيانات تمام ، لا مش تمام بعد كتابة الارقام دى روح نسق الخلايا دى وليكن خليها بالدولار أنا بحب الدولار ، زى الصور اللى قدامنا كدا
نفتح بقى الخميرة الفورية ونقف على السطر اللى فيه الكود ونضغط Enter تانى ونلاحظ النتائج التالية
هنلاحظ ان الناتج الاول والتانى Value, Value2 شالوا تنسيق الارقام عدا Text زى ما هو قدام عينك ملوش دعوه ايه قيمة الرقم دا
هنلاقى الخاصية Text أخدت الرقم بالفاصلة , بعد رقم 12 وعلامة الدولار $ وبابا غنوبوا
تعلوا بقى نوضح امتى يختلف Value و Value2 نروح نكتب تاريخ ميلادى أنا حر
B |
A |
|
01/09/1995 |
Value |
1 |
01/09/1995 |
Value2 |
2 |
01/09/1995 |
Text |
3 |
يلا نضغط Enter فى الخميرة الفورية ونشوف الناتج ، هنلاقيه بالشكل دا
01/09/1995, 34943, 01/09/1995
هنلاحظ ان Value اخدت قيمة الرقم بتنسيق التاريخ هو مش بيحب يزعل تاريخ ميلادى بس
أما Value2 مهما كان التنسيق هو بياخد القيمة الرقمية الحقيقية وراء هذا التنسيق
وText لو كان ايه بالذى مكتوب هو بيظهرلك الظاهر بالخلية تماما زى ما انت شايفه قدام عينك هيستخرجوا
ولكن ناخد بالنا من حاجه ، ان الخاصية Value أخدت تنسيق التاريخ كتاريخ لكن لو التنسيق دا فيه نص فمثلا حول تنسيق التاريخ دا عندك Long Date بدلا من Short Date
ومش هكمل ، كمل انت لوحدك وقولى انت فهمت ايه ، بس متغيرش التاريخ ، اصل التاريخ دا فيه بركه شويه
طيب تعالوا نجرب بقى الموضوع دا بالعكس يعني بدل ما كنا بنستخرج البيانات ، المره دى هندخل البيانات بالخلايا
ونجرب الكود دا كدا
CODE
Sub Abo_Albraa()
Range("C1").Value = "Abo Albraa"
Range("C2").Value2 = "Abo Albraa"
Range("C3").Text = "Abo Albraa"
End Sub
لما تشغل الكود كدا هيطلع خطا ، ليه ياعم
العم قالك انت مش انت وانت جعان
لان مينفعش نستخدم الخاصية Text لادخال البيانات بل استخراجها كما ترى العين المجردة
غير كدا تزعل ، هيا بتاخد على خاطرها شويه
يبقى نشتغل على الخاصيتين الفاضلين ونستخدم الكود التالى عشان ندخل اسم الغالى أبو البراء بالخلايا المحددة وهما C1 و C2
CODE
Sub Abo_Albraa()
Range("C1").Value = "Abo Albraa"
Range("C2").Value2 = "Abo Albraa"
'Range("C3").Text = "Abo Albraa"
End Sub
حطينا ' عشان نوقف السطر التالت بالكود ودلوقتى نشغل الكود
هتلاقى اسم الغالى ظهر بالخليتين عادى
لكن تعالوا نغير فى شكل عرض النص أو طوله مش هتفرق
ونكتب الكود التالى
CODE
Sub Abo_Albraa()
Range("C1").Value = #9/1/1995#
Range("C2").Value2 = #9/1/1995#
'Range("C3").Text = "Abo Albraa"
End Sub
ونشغل الكود وطبعا يكون تنسيق الخلايا General أى عام عشان نلاحظ الفرق
هنلاحظ ان ناتج Value ظهور التاريخ كما مكتوب أما Value2 بتجيب من الاخر وجابت الرقم مش بتحب توجع دماغها
ومعلومة أخيرة كدا نلاحظ ان التاريخ بالشكل دا #9/1/1995# معانا شهر 9 ويوم 1 وسنة 1995
يعنى ماشى بنظام شهر يوم سنة ممكن أيضا نستخدم دالة DateSerial هيا نفس دالة Date بورقة العمل
تتكون من 3 باراميترات الأول للسنة والثانى للشهر والثالث لليوم
مثال عملى كالتالى
CODE
Sub Abo_Albraa()
Range("C1").Value = DateSerial(1995, 9, 1)
Range("C2").Value2 = DateSerial(1995, 9, 1)
'Range("C3").Text = "Abo Albraa"
End Sub
أهم حاجة محدش يشيل السطر الأخير هو ملوش تأثير بس فيه اسم البركه كلها 
وبكدا يكون انتهى الدرس
كان معكم ومعنا ومعهم برضوا
أخوكم فى الله ، اسلام عبدالله
فى أمان الله وحفظه 