logo

لوحة التميز الأسبوعي
العضو المتميز المشرف المتميز المراقب المتميز المدير المتميز الموضوع المتميز القسم المتميز
العضو المتميز المشرف المتميز المراقب المتميز المدير المتميز الموضوع المتميز القسم المتميز
abdelmoniem ismail لا تميز خلال هذه الفترة-- لا تميز خلال هذه الفترة لا تميز خلال هذه الفترة توزيع المعلمين في جدول الحصص حسب النصاب بشروط اكسيل مشاريع جاهزه



أهلا وسهلا بك زائرنا الكريم في أكاديمية الصقر للتدريب، لكي تتمكن من المشاركة ومشاهدة جميع أقسام المنتدى وكافة الميزات ، يجب عليك إنشاء حساب جديد بالتسجيل بالضغط هنا أو تسجيل الدخول اضغط هنا إذا كنت عضواً .





02-08-2018 01:54 صباحاً
معلومات الكاتب ▼
تاريخ الإنضمام : 03-10-2017
رقم العضوية : 852
المشاركات : 1580
الدولة : مصر
الجنس :
تاريخ الميلاد : 1-9-1995
الدعوات : 5
قوة السمعة : 10861
الاعجاب : 6
موقعي : زيارة موقعي
السلام عليكم ورحمة الله وبركاته
اليوم أقدم لكم أخر حلقات افتح الباب ياعبد التواب cool فى الـVBA للأستاذ ياسر خليل
وسيكون شرح عن الحلقات التكرارية وبها نختم دورة افتح الباب لعالم الـVBA
والآن اترككم مع الفنان أبو البراء biggrin2
..............................................................................................................................
السلام عليكم ورحمة الله وبركاته
وحشتكم !! أكيد لا .. لأني لو وحشتكم كنتو فتحتوا الباب وسألتوا عليا .. عموما إنتو وحشتوني ، وعشان وحشتوني هاقدم لكم حلقة جديدة يمكن تفتكروني.

النهاردة هتكلم عن حاجة ناس كتير شرحوها ، وشرحوها بشكل ممتاز ، ودا خلاني مش عارف أشرح إزاي ، لأن اللي شرحوها وفوا شرحها صراحة ..

هنتكلم عن الحلقات (بس مش حلقات افتح الباب) الحلقات اللي هنتكلم عنها الحلقات التكرارية ، ومن اسمها هي عبارة عن حلقات بتتكرر (إضافة عظيمة!) wink_3

اسمها بالإنجليزي Loops ودي مهمة جداً في عالم الأكواد ، محدش يقدر يستغنى عنها تقريباً ..

نفترض إني دخلت الفصل (بما إني معلم) ولسه دي أول مرة أتعرف على الطلبة اللي في الفصل ..يا ترى أنا عندي استعداد أخلى طالب طالب يقوم وأنا أقوله قول اسمك والطالب اللي بعديه قول اسمك .. أعتقد إن ريقي هينشف ودماغي هتصدع ودا طبعا مش يرضيكم (مش كدا ولا ايه) ..أنا من النوع الكسول فكل اللي هعمله هعمل تكرار من أول طالب في الفصل لآخر طالب ، وأعطي الأمر مرة واحدة ..

CODE
من أول طالب إلى آخر طالب
      قووووول اسمك يا حبيبي
الطالب التالي

هو دا شكل الحلقة التكرارية .. نبرمجها بلغة الـ VBA ...

هنقول إن الفصل فيه 60 طالب
(معلش دا واقع الفصول في مصر) .. نقطة مهمة مننساش إن الطالب متغير مش ثابت ، فنرمز للطالب المتغير بالرمز X مثلاً ...​
CODE
Sub Loops()
    Dim X As Long
    For X = 1 To 60
        'Say your name
    Next X
End Sub

طبعاً الكود دا شوية له علاقة بالبرمجة وشوية هتش .. ايه اللي هنعمله ..زي ما اتعودنا (دايما) إننا نعرف المتغير .. ونركز في السطر الثاني بدأ بكلمة For متبوعة باسم المتغير اللي هو X وبعدين علامة يساوي عشان نحدد قيمة X المتغيرة (أو الطالب المتغير) وهنا القيمة ليها بداية وليها نهاية (كل شيء له بداية ونهاية) وبيفصل بين البداية والنهاية حرف الجر To

وفي آخر الحلقة التكرارية جملة Next X وممكن نقول Next ونسكت ، ومحرر الأكواد هيفهم لوحده .. بس أنا تقليدي شويتين فخلينا نكتب المتغير ، عشان الكود ممكن يكون فيه أكتر من حلقة تكرارية ..

الجزء المهم هو الجزء اللي بين السطرين ، وهو دا الأمر المطلوب تكراره ، السطر اللي هنا مجرد تعليق وهتش وملوش علاقة بالبرمجة .. بس حبيت أقرب لكم الفكرة بأسلوب جديد..


كدا لما أنفذ الكود اللي فات ، كل اللي عملته إني أعطيت الأمر مرة واحدة وبس (وأنا حاطط رجل على رجل ... الدورة تلف على طالب طالب ، ويقول اسمه ، ولما يخلص ، الدورة تنتقل للطالب اللي بعديه وهكذا إلى أن ينتهي الطلاب ، ولما الـ 60 طالب يخلصوا ..يتم إيقاف تنفيذ الكود...



ناخد أول مثال بجد 1 عشان نقدر نتعلم إزاي نستفيد من الحلقات التكرارية ::

لنفترض أننا عايزين نرقم النطاق A1:A10 بالأرقام من 1 إلى 10يعني الخلية A1 = 1 والخلية A2=2 وهكذا ..طبعا الموضوع بسيط جدا

CODE
Sub NumberRange()
    Range("A1").Value = 1
    Range("A2").Value = 2
    Range("A3").Value = 3
    Range("A4").Value = 4
    Range("A5").Value = 5
    Range("A6").Value = 6
    Range("A7").Value = 7
    Range("A8").Value = 8
    Range("A9").Value = 9
    Range("A10").Value = 10
End Sub

كود في منتهى الروعة .. شايف حسام بيضحك ويقولي عايزك ترقم النطاق من A1:A100 (وابتسم ابتسامة فيها شماته !!) rolleyes mad_1

نفكر شوية .. بقول نفكر شوية
(بلاش تكمل الحلقة غير لما تبص في الكود وتفكر شوية .. فكر شوية واكسب التوفير في الوقت والجهد)

ايه المشترك في أسطر الكود .. وايه المختلف .. المتشابه في كل الأسطر
CODE
Range("A ").Value =

والمختلف هو الرقم بعد حرف الـ A ، والقيمة اللي بعد علامة يساوي ..

في السطر الأول الرقم اللي بعد حرف الـ A هو 1 ، والقيمة بعد علامة يساوي بردو 1 ، ونفس الكلام مع السطر رقم 2 ، ورقم 3 وهكذا

يبقا أول حاجة تفكر فيها إنك المختلف أو المتغير أو الشيء الغير ثابت تضعه في متغير ، ودا لأنه مش ثابت ومتغير .. فنضع متغير باسم X مثلاً

ونعمل حلقة تكرارية من 1 إلى 10 (دي القيم اللي هيحملها المتغير)

CODE
Sub NumberRange()
    Dim X As Long
    For X = 1 To 10
        Range("A" & X).Value = X
    Next X
End Sub

نفس الكود اللي شرحناه من شوية ، الاختلاف في السطر اللي بين سطري التكرار .. الحلقة هتدور 10 مرات ، وفي كل مرة المتغير X بيحمل قيمة مختلفة (نرررررركز في الجزئية اللي جاية لأنها مهمة جداً جداً )

مش هنفذ الكود مرة واحدة .. سنقوم بعملية التنفيذ واحدة واحدة ، اللي مستعجل يروح ينفذ الكود مرة واحدة ، واللي مش مستعجل أنا معاه ..عشان يعرف حاجة مش هيعرفها الأخ المستعجل ...

ضع مؤشر الماوس في أي مكان في الكود .. جميل >> اضغط F8 من لوحة المفاتيح ، وجمد قلبك وقول يا رب .. لاحظت ايه يا عبد المحسن؟

عبد المحسن ناااااااام مني (الله يسامحك) ..عبد المحسن : شايف الدنيا صفرا ليه ، هو فيه عاصفة النهاردة كمان؟ .. رديت عليه : لا يا عبد المحسن كمل نومك ، السطر الأصفر اللي ظهر ده سببه إننا ضغطنا F8 .. ودا فايدته إننا هنقوم بعملية التنفيذ واحدة واحدة .. سطر سطر ..

السطر الأصفر على أول سطر في الكود

CODE
Sub NumberRange()

اضغط F8 مرة تانية ، ايه اللي حصل انتقل السطر الأصفر للسطر التالت ، طيب والسطر التاني يا معلم .. ملوش لازمة !!!

أكبر خطأ إنك تعتقد إنه ملوش لازمة ، لما ضغطنا F8 للمرة التانية ، محرر الأكواد خزن في الذاكرة كل المتغيرات الموجودة في الكود

عايز تتأكد من كلامي ، حرك مؤشر الماوس اللي على شكل حرف I
(فيه شرطة فوق وشرطة تحت) حرك الماوس من غير ما تدوس كليك .. واقف على المتغير X هتلاقي تلميح في مستطيل صغير بيقولك المتغير X=0 ، دي كدا القيمة المبدئية للمتغير ...

لما تضغط F8 للمرة التالتة ، روح شوف قيمة X مرة تانية هتلاقي قيمة X=1 (ايه اللي خلاها 1 مش كانت صفر من لحظة )

اللي حصل إننا انتقلنا من السطر

CODE
For X = 1 To 10

والسطر دا هيبدأ في عمل الحلقة التكرارية اللي بنقول عليها ، والحلقة بدايتها 1 زي ما حددنا (وطبعاً ممكن نغير نقطة البداية يا شباب .. مش شرط 1)

حرك مؤشر الماوس من غير ما تدوس على المتغير X في السطر المظلل بالأصفر

CODE
Range("A" & X).Value = X

هنلاقي زي ما قلت إن X =1

يعني محرر الأكواد هيعمل ايه دلوقتي ، هيشيل كل X ويحط مكانه القيمة 1 ، فيصبح السطر في الذاكرة بهذا الشكل

CODE
Range("A1").Value = 1

لحد كدا تمام التمام ، صغر محرر الأكواد بحيث تكون ورقة العمل ظاهرة بالنسبة لك واتأكد إن النطاق A1:A10 فارغ ليس به أي بيانات ، وركز في ورقة العمل ، واضغط F8 عشان تنقل السطر الأصفر إلى هذا السطر ، ولاحظ ورقة العمل
CODE
Next X

لاحظت يا منصور الخلية A1 وضعت فيها القيمة 1 ، نخلي بالنا إن السطر الأصفر بيتم تنفيذه بعد الخروج منه ، فلما خرجنا من السطر تم تنفيذ الأمر وأعطى القيمة 1 للخلية A1 ..

اضغط F8 مرة أخرى ، ونلاحظ إن السطر الأصفر انتقل للسطر اللي قبليه ، مش لبداية الحلقة التكرارية ، يعني ببساطة السطر اللي بيحدد بداية الحلقة ونهايتها بيعدي عليه مرة واحدة فقط ..

أما سطر الأمر والسطر اللي فيه كلمة Next بيبدل السطر الأصفر عليهم... نبص دلوقتي على قيمة المتغير X هنلاقيها بقت 2 فيتم تنفيذ السطر بمجرد الضغط على F8 ويضع القيمة 2 في الخلية A2 وهكذا ..جرب واضغط F8 وفي كل مرة شوف قيمة المتغير X وشوف النطاق A1:A10 في كل مرة

أول ما توصل قيمة المتغير X إلى الرقم 10 تتوقف الحلقة التكرارية ، وينتقل السطر الأصفر لجملة End Sub .. وينتهي عمل الكود ..​

عارف إني طولت في النقطة اللي فاتت ، بس كان لازم أطول فيها ، عشان أنا فاضي ومفيش ورايا شغل ، فقلت أصدعكم شوية yes


ننتقل لمثال آخر
---------------

عشان نقدر نفهم إزاي نستفيد من الحلقات التكرارية .. عايزين نعد الاسم (اسلام) في النطاق A1:A10

نفترض إني عندي الأسماء دي في النطاق A1:A10

CODE
اسلام
ياسر
عماد
حسام
عيسى
اسلام
اسلام
خليل
عبدالله
اسلام

المطلوب : نشوف الاسم (اسلام) كم مرة تم تكراره .. المعطيات : استعن بالله ثم بالحلقة التكرارية ..

الفكرة : هنعمل اختبار صغير بقاعدة IF وهنقول لو قيمة الخلية بتساوي "اسلام" .. زود المتغير Counter بقيمة واحد

CODE
Sub CountName()
    Dim X As Long
    Dim Counter As Long
    For X = 1 To 10
        If Range("A" & X).Value = "اسلام" Then Counter = Counter + 1
    Next X
    MsgBox Counter
End Sub

عملنا متغير جديد باسم Counter عشان لما يتحقق الشرط ويلاقي الاسم "أحمد" يقوم يخلي المتغير Counter يساوي نفسه + 1

طيب ليه يساوي نفسه ، عشان في كل مرة يلاقي أحمد قيمته هتتغير فلازم نضيف واحد لكل Counter جديد

النتيجة في الآخر هتظهر في رسالة ، وهي 4 ..

طيب نجرب نشيل الواحد في هذا السطر

CODE
Counter = Counter + 1

لو شيلنا الواحد هتكون النتيجة 0 ، لأن المتغير قيمته المبدئية صفر ، فلما يتحقق الشرط مش هيزيد المتغير إلا لما نضيف واحد في كل مرة يتحقق الشرط.

هناخد مثال آخر
----------------

عندنا درجات في النطاق A6:A15 ، عايزين نكتب ناجح أوراسب في الخلية المجاورة للدرجة ، لو الدرجة أكبر من أو يساوي 50 يبقا ناجح ، مكانش يكون راسب ...

نخلي بالنا أنا غيرت بداية النطاق عشان الحلقة التكرارية بردو هتتغير بدايتها ونهايتها طبقاً للصفوف الجديدة

CODE
58
41
88
40
50
40
98
94
60
35


نجرب الكود التالي ..
CODE
Sub LoopsTest()
    Dim X As Long
    For X = 6 To 15
        If Cells(X, 1).Value >= 50 Then
            Cells(X, 2).Value = "ناجح"
        Else
            Cells(X, 2).Value = "راسب"
        End If
    Next X
End Sub

نلاحظ الحلقة التكرارية بدأت من 6 إلى 15 (ودا متغير للصفوف من الصف رقم 6 إلى الصف رقم 15)

ووضعنا الشرط بين سطري الحلقة التكرارية ، لو الخلية اللي في الصف X والعمود الأول أكبر من أو يساوي 50 يقوم يعمل ايه؟

يضع القيمة النصية "ناجح" في الخلية اللي في العمود الثاني والصف X (نفس الصف بالطبع لأن قيمة X في الحالة دي هي هي نفس القيمة لأننا في نفس اللفة) .. إذا لم يتحقق الشرط قام بتنفيذ الجزء الثاني بأن يكتب النص "راسب" ثم إغلاق جملة IF بالجملة End IF ومننساش القفلة زي ما اتعودنا..


ننتقل لآخر مثال في الحلقة دي (عشان أنا تعبت وإنتو كمان أكيد تعبتو)

في الأمثلة اللي فاتت عملنا حلقات تكرارية للصفوف .. واحد بيقولي طيب والأعمدة ملهاش نصيب في الدوخة اللي إحنا فيها دي .. أقوله أكيد ليها نصيب ..

المطلوب إننا في الصف الرابع ، نكتب معادلة
CODE
=COLUMN()

بس في الأعمدة من العمود رقم 1 إلى العمود رقم 15 (A To O)

نعقدها شوية ونقول في الأعمدة اللي رقمها فردي بس (الأعمدة اللي رقمها زوجي مش محتاجينها)

يعني ببساطة عايزين نحط المعادلة في الأعمدة A C E G I K M O

CODE
Sub ColumnsLoop()
    Dim X As Long
    For X = 1 To 15 Step 2
        Cells(4, X).Formula = "=COLUMN()"
    Next X
End Sub

الحلقة التكرارية بدأت من العمود الأول حتى العمود رقم 15 (البداية والنهاية)

معلومة جديدة Step 2
(دي معناها إننا هنقفز ..والقفز هيكون بمقدار 2 أي خطوتين) بدأنا بـ 1 فلما نقفز بمقدار 2 ، هنروح لرقم 3 ، أي أن المتغير سيكون رقم فردي في كل مرة 1 ، 3 ، 5 ، 7 ، 9 ، 11 ، 13 ، 15 (وهو دا المطلوب بالضبط)

سطر الأمر فيه الخاصية Formula ودي عشان نقدر نضع معادلة من خلالها .. والمعادلة ببساطة زي ما شفناها من شوية بس بتكون بين أقواس تنصيص ..

طيب الجزء الأول من السطر نلاحظ إننا استخدمنا Cells ودي بتكون متبوعة بقوسين ، وبين القوسين رقم الصف ثم فاصلة ثم رقم العمود ، وبما إن رقم الصف ثابت اللي هو رقم 4 ، فكتبناه زي ما هو .. اما رقم العمود فمتغير فوضعنا رقم العمود X ...


جرب الكود وشوف النتيجة بنفسك

أرجو أن أكون قد وفقت في توصيل المعلومة بأسلوب مبسط

كان معكم أخوكم أبو البراء من تراك أكاديمية الصقر (لف على الحلقات من الحلقة رقم 1 إلى الحلقة رقم 14 .. لو عايز تتعلم الـ VBA)

ويا رب ميكونش فيه حد جاله دووووووووخة من كتر اللف .. والله أنا اللي دوخت blushing

أستودعكم الله .. دمتم في رعاية الله

تقبلوا تحياتي .. دمتم بود 818181
...................................................................................................................................................................................
واخطف المايك من أستاذ ياسر ، بس خلاص كفاية كدا ، والسلام عليكم ورحمة الله وبركاته 81
...................................................................................................................................................................................

أثارت هذه المشاركة إعجاب: الرحال، elabassy، مدحت حافظ، علي بطيخ سالم،



look/images/icons/i1.gif الحلقة الرابعة عشر الحلقات التكرارية
  02-08-2018 06:13 صباحاً   [1]
معلومات الكاتب ▼
تاريخ الإنضمام : 27-08-2017
رقم العضوية : 213
المشاركات : 75
الجنس :
تاريخ الميلاد : 20-12-1971
قوة السمعة : 191
الاعجاب : 0
رائع ..جزاك الله خيرا استاذنا ابا البراء ...والشكر موصول للاستاذ اسلام عبد الله .

أثارت هذه المشاركة إعجاب: Eslam Abdullah،



look/images/icons/i1.gif الحلقة الرابعة عشر الحلقات التكرارية
  02-08-2018 07:48 صباحاً   [2]
معلومات الكاتب ▼
تاريخ الإنضمام : 15-03-2018
رقم العضوية : 4874
المشاركات : 194
الجنس :
تاريخ الميلاد : 29-5-1982
الدعوات : 1
قوة السمعة : 469
الاعجاب : 0
رائع انت استاذ اسلام فهل من أحد هنا يسهل ويبسط وييسر ويفهم مثلك
إني أحبك في الله
جزيت خيرا عنا

أثارت هذه المشاركة إعجاب: Eslam Abdullah،



look/images/icons/i1.gif الحلقة الرابعة عشر الحلقات التكرارية
  02-08-2018 07:52 صباحاً   [3]
معلومات الكاتب ▼
تاريخ الإنضمام : 22-08-2017
رقم العضوية : 43
المشاركات : 853
الجنس :
تاريخ الميلاد : 1-5-1989
الدعوات : 1
قوة السمعة : 6611
الاعجاب : 2
لماذا أخر حلقات افتح الباب ياعبد التواب
ما تسيبوها يا اخي مسلسل مكسيكي




look/images/icons/i1.gif الحلقة الرابعة عشر الحلقات التكرارية
  02-08-2018 08:26 صباحاً   [4]
معلومات الكاتب ▼
تاريخ الإنضمام : 21-08-2017
رقم العضوية : 3
المشاركات : 10529
الجنس :
تاريخ الميلاد : 1-10-1978
الدعوات : 24
قوة السمعة : 36752
الاعجاب : 184
أخي العزيز أحمد الحاوي
الأروع هو مرورك العطر بالموضوع .. بارك الله فيك

أخي العزيز محمود
أحبك الله الذي أحببتنا فيه ومشكور على كلماتك الطيبة

أخي العزيز سليم
الحلقات انتهت لأنها كانت مجرد معرفة للبدايات التي لا يمكن الاستغناء عنها ، ثم تلا تلك الحلقات الكثير والكثير والكثير من الدروس والأكواد والشروحات .. وعلى من يريد التعلم البحث والتنقيب ، فلقد وضعت دروس كثيرة ولله الفضل والمنة ..

وهتسألني عن منة!! هقولك شوف إسلام يسأل عنايات ويعرفنا بمنة laugh

أثارت هذه المشاركة إعجاب: Eslam Abdullah، علي بطيخ سالم،



look/images/icons/i1.gif الحلقة الرابعة عشر الحلقات التكرارية
  13-11-2019 11:24 مساءً   [5]
معلومات الكاتب ▼
تاريخ الإنضمام : 20-11-2018
رقم العضوية : 9257
المشاركات : 802
الدولة : مصر
الجنس :
تاريخ الميلاد : 13-9-1980
قوة السمعة : 3941
الاعجاب : 23
جزاكم الله خيرا استاذ اسلام
وجزاكم الله خيرا ابو البراء الغالى
لو عايزين نعمل رقم العامود متغير ورقم الصف متغير الكود مفروض يبقي ازاي

أثارت هذه المشاركة إعجاب: Eslam Abdullah،



look/images/icons/i1.gif الحلقة الرابعة عشر الحلقات التكرارية
  14-11-2019 04:10 صباحاً   [6]
معلومات الكاتب ▼
تاريخ الإنضمام : 21-10-2019
رقم العضوية : 15301
المشاركات : 89
الجنس :
تاريخ الميلاد : 5-2-1973
قوة السمعة : 112
الاعجاب : 2
السلام عليكم استاذ اسلام انا لسه عضو جديد فى هذا المنتدى الرائع لم يسعفنى الحظ فى متابعة حلقات البرمجة منذ البداية ممكن حضرتك باقى الحلقات السابقة عشان الواحد يبقى متابع الموضوع بشكل صحيح احييك على اسلوب الطرح ممتاز جدا ومبسط للغاية واجمل مافيه انه بعيد عن الممل تماما والامثلة متدرجة المستوى جزاك الله خيرا على هذا المجهود

أثارت هذه المشاركة إعجاب: Eslam Abdullah،



look/images/icons/i1.gif الحلقة الرابعة عشر الحلقات التكرارية
  14-11-2019 06:26 صباحاً   [7]
معلومات الكاتب ▼
تاريخ الإنضمام : 21-08-2017
رقم العضوية : 3
المشاركات : 10529
الجنس :
تاريخ الميلاد : 1-10-1978
الدعوات : 24
قوة السمعة : 36752
الاعجاب : 184
بارك الله فيكم إخواني الكرام

يمكن استخدام متغير للعمود والصف في الحلقات التكرارية المتداخلة بدون أي مشكلة .. إن شاء الله سأحاول طرح موضوع يخص إنشاء جدول الضرب لتتضح صورة الحلقات المتداخلة (صفوف وأعمدة)

أثارت هذه المشاركة إعجاب: Eslam Abdullah، hassona229،



look/images/icons/i1.gif الحلقة الرابعة عشر الحلقات التكرارية
  15-11-2019 12:22 صباحاً   [8]
معلومات الكاتب ▼
تاريخ الإنضمام : 20-11-2018
رقم العضوية : 9257
المشاركات : 802
الدولة : مصر
الجنس :
تاريخ الميلاد : 13-9-1980
قوة السمعة : 3941
الاعجاب : 23
منتظرين الشرح بفارغ الصبر استاذنا الحبيب

أثارت هذه المشاركة إعجاب: Eslam Abdullah،



look/images/icons/i1.gif الحلقة الرابعة عشر الحلقات التكرارية
  08-04-2020 08:01 مساءً   [9]
معلومات الكاتب ▼
تاريخ الإنضمام : 01-11-2019
رقم العضوية : 15642
المشاركات : 20
الجنس :
تاريخ الميلاد : 1-1-1980
قوة السمعة : 26
الاعجاب : 0
شرح ممتاز بارك الله فيك

أثارت هذه المشاركة إعجاب: Eslam Abdullah،



look/images/icons/i1.gif الحلقة الرابعة عشر الحلقات التكرارية
  09-04-2020 01:03 صباحاً   [10]
معلومات الكاتب ▼
تاريخ الإنضمام : 21-08-2017
رقم العضوية : 3
المشاركات : 10529
الجنس :
تاريخ الميلاد : 1-10-1978
الدعوات : 24
قوة السمعة : 36752
الاعجاب : 184
بارك الله فيك أخي الكريم وجزيت خيراً وأرجو لكم الاستفادة من هذه الدروس.

أثارت هذه المشاركة إعجاب: Eslam Abdullah،



اضافة رد جديد اضافة موضوع جديد



المواضيع المتشابهه
عنوان الموضوع الكاتب الردود الزوار آخر رد
4-المحاضرة الرابعة دورة استخدام الاكسيل فى تحليل البيانات مع عبدالجيد محمد-ج1-تحديد النطاقات عبدالجيد
4 37 starta
الحلقة الرابعة المتغيرات Eslam Abdullah
12 2851 YasserKhalil

الكلمات الدلالية
الحلقة ، الرابعة ، الحلقات ، التكرارية ،









اخلاء مسئولية: يخلى منتدى أكاديمية الصقر للتدريب مسئوليته عن اى مواضيع او مشاركات تندرج داخل الموقع ويحثكم على التواصل معنا ان كانت هناك اى إنتهاكات تتضمن اى انتهاك لحقوق الملكية الفكرية او الادبية لاى جهة - بالتواصل معنا من خلال نموذج مراسلة الإدارة .وسيتم اتخاذ الاجراءات اللازمة.
سياسة النشر: التعليقات المنشورة لا تعبر عن رأي منتدى أكاديمية الصقر للتدريب ولا نتحمل أي مسؤولية قانونية حيال ذلك ويتحمل كاتبها مسؤولية النشر.

الساعة الآن 12:38 PM