السلام عليكم ورحمة الله وبركاته
عدنا لكم اخوانى الكرام وفى حلقة جديدة فى دورة افتح الباب للأستاذ ياسر خليل
نتعلم فيها كيفية ترتيب البيانات تنازليا و تصاعديا
والان اعطى المايك لأبو البراء ، اتفضل أغالى 
...................................................................................................................................................................
السلام عليكم ورحمة الله وبركاته
من أول الحلقة دي إن شاء الله هنبدأ نتعامل مع مهارات التعامل مع محرر الأكواد ، عايزين نوصل للاحتراف ..
هنتكلم عن مهارة كتير بنحتاج نتعلمها ، ألا وهي الفرز أو الترتيب أو ما يطلق عليها باللغة اللي مش عربية Sort
هنشتغل عملي علطول (أو على عرض ..مش هتفرق كتير) ..نفتح مع بعض ورقة عمل ، ومحدش يستنى مني إني أرفق ملف ، لأنك عشان تتعلم يبقا لازم تشتغل بايدك سيبك بقا من شغل النظري اللي مبيوكلش عيش ده ! افتح يا سمسم ، شعارنا في الحلقات افتح (مرة افتح الباب ..افتح مصنف جديد ..افتح الخيارات في البرنامج ..افتح محرر الأكواد .. وشوية واحد هيقولي لو مبطلتش رغي هآجي أفتح دماغك وأريح الناس من رغيك)
نفتح ورقة العمل ونكتب شوية بيانات عشان هنشتغل عليها ...وعشان أريحكو أدي شوية بيانات بدل ما تتعبوا ايديكم يا أحباب ، أنا بردو يهمني راحتكم
CODE
م الاسم النوع
1 ياسر ذكر
2 اسلام ذكر
3 حسام ذكر
4 محمد ذكر
5 عمرو ذكر
6 عماد ذكر
7 محمود ذكر
8 يوسف ذكر
9 مروه أنثى
10 رؤى أنثى
11 أميرة أنثى
12 آية أنثى
13 نور ذكر
14 إيناس أنثى
15 لمياء أنثى
16 أحمد ذكر
17 إبراهيم ذكر
18 سارة أنثى
19 عز ذكر
حدد البيانات وتعالى لورقة العمل في الخلية A1 ، واعمل كليك يمين ، ثم اختر Paste Special (لصق خاص) ثم اختر من النافذة اللي هتطلع لك Text ، بكدا هتلاقي عندك 3 أعمدة (عمود للمسلسل ودا عشان مسلسل افتح الباب ، وعمود الأسماء ، وعمود النوع.. )
ويا ريت ننسخ البيانات في نطاق تاني مرة تانية لأننا هنجرب عليها أكتر من تجربة (ضعها مرة أخرى في النطاق K1:M20 مثلاً )!!
المطلوب : ترتيب البيانات حسب الاسم ، ودا أمر بسيط جدا ومش معقد أبداً .. 
طريقة الحل : نروح للتبويب Developer ثم نختار Record Macro ثم نقف في الخلية A1 في بداية البيانات ، ونروح للتبويب Data ثم الأمر Sort ونختار من الحقل اللي اسمه Sort By نختار الاسم (لأن هو دا الحقل المطلوب الترتيب على أساسه) ، وفي الحقل الثالث المسمى Order (ودا شكل الترتيب ونختار يا أستاذ مختار A to Z (هتلاقي هو دا الخص الافتراضي أقصد الخيار الافتراضي )
يعني الترتيب أو الفرز حاجة من اتنين يا إما تصاعدي A to Z (من تحت لفوق) ودا بيسموه الجماعة اللي ما يتسموا (Ascending) أو تنازلي Z to A (من فوق لتحت) ودا اللي بيسموه في اللغة الأجنبية Descending ، وعشان ميحصلش عندك لخبطة الكلمة Ascending بتبدأ بحرف الـ A تبقا دي A to Z (الترتيب التصاعدي) !!
كل دا إحنا بنسجل يا حسين (اعدل الكرافتة عشان صورتك تطلع حلوة) ..Stop أنا المخرج وبقول Stop يعني وقف التسجيل ..
ياااااااه كانت حلقة صعبة أوي الحلقة دي ، التسجيل بيحتاج مجهود جبار عشان تطلع الحلقة حلوة ولذيذة !!! 
دلوقتي جه وقت الجد ، اللي إحنا منعرفوش ، ندخل المغارة (على رأي الكبير حسام خطاب..صقر المنتدى) ، هندخل المغارة عن طريق Alt + F11 معلومة قديمة ، طيب هندخل نعمل ايه ؟ أكيد هندخل عشان ندور على الكنز ..مش دي بردو مغارة ياسر بابا !!
هنلاقي الكنز بس مدفوووووووون تحت الأنقاض
CODE
Sub Macro1()
'
' Macro1 Macro
'
'
Range("A1:C20").Select
ActiveWorkbook.Worksheets("Sheet1").Sort.SortFields.Clear
ActiveWorkbook.Worksheets("Sheet1").Sort.SortFields.Add Key:=Range("B2:B20") _
, SortOn:=xlSortOnValues, Order:=xlAscending, DataOption:=xlSortNormal
With ActiveWorkbook.Worksheets("Sheet1").Sort
.SetRange Range("A1:C20")
.Header = xlYes
.MatchCase = False
.Orientation = xlTopToBottom
.SortMethod = xlPinYin
.Apply
End With
End Sub
دا اللي إحنا سجلناه ..إحنا طلعنا شطار وبنعرف نسجل كويس جداً ..الكنز فين يا نور العين؟ الكنز مدفون ما بين الأسطر ..إزاي نقدر نخرجه..
أقولكم دا كله ه ت ش !! اللي عمله محرر الأكواد في سنين هنختصره إحنا في ثانية واحدة وبسطر واحد (وهي دي الشطارة !!)
CODE
Range("A1:C20").Sort Key1:=Range("B1:B20"), Order1:=xlAscending, Header:=xlYes
ضع هذا السطر اللذيذ في إجراء فرعي وجربه ، هنلاقي إنه بينفذ نفس الكود الطويل اللي سعادة محرر الأكواد سجله .
طيب نهضم السطر اللي اتكتب : أول شيء عشان تقدر تتعامل في أي كود إنك تحدد الخلية أو النطاق اللي هتتشغل عليه ، وأظن دي واضحة جدا ، فالنطاق اللي هنشتغل عليه واللي فيه البيانات هو A1:C20 ، وممكن في الكود نحدد أول خلية في النطاق بس يعني ممكن يكون شكله كدا :
CODE
Range("A1")
بس أنا أفضل إننا نكتب النطاق بالكامل ، وبعد ما حددنا النطاق ، نطلق الحدث أي الفعل ، يعني السؤال المتوقع ايه المطلوب نعمله في النطاق :
الإجابة نطبطب عليه وندلعه ، إجاية غير صحيحة ، الإجابة إننا نفرسه (هذه هي الإجابة الصحيحة ..نعم نفرزه ونرتبه زي ما إحنا عايزين)
والفرز بيكون بكلمة Sort ونترك مسافة واحدة بالمسطرة بعد الفرز .. ونبدأ نشوف حاجة اسمها بارامترات الحدث Method ، ودي ممكن نشوفها في تسجيل الماكرو اللي قام بيه محرر الأكواد ..
إحنا هناخد المهم وبس ، ميهمناش الدش الكتير !! أول بارامتر هو مفتاح الفرز أو الترتيب Key، بمعنى آخر المقصود بيه العمود اللي هيتم على أساسه الفرز ، والعمود هنا هو عمود الأسماء B1:B20 ، ونفس الكلام ممكن نستغنى عن النطاق بالكامل ونذكر فقط أول خلية في العمود B1 بالشكل ده
CODE
Key1:=Range("B1")
طيب محدش سأل ايه الواحد اللي جنب المفتاح (دا الحارس الشخصي للمفتاح عشان محدش يسرقه) ..الواحد ده يا أساتذة هو المفتاح الأول لعملية الفرز ، وهنفهم الحتة دي لما ناخد مثال تاني ...
بعد كلمة Key1 نقطتين فوق بعض (Shift + حرف الكاف : ) وسواء وإنت بتكتب عربي أو إنجليزي (الاتنين سواسية).. يليها علامة يساوي ..
ومعروف إن علامة يساوي ييجي بعدها قيمة ، ونترجم الكلام ده إن قيمة المفتاح الأول هو النطاق B1:B20 (أفضل إنه يتكتب نطاق العمود بالكامل)
ناخد فاصل ، لا مش هنريح يا عبد الله ، أقصد فاصلة مش فاصل ، الفاصلة دي هي اللي بتفصل بين البارامترات يا أحباب ..
ننتقل للبارامتر الثاني والمسمى Order ودا ترجمته يا أخ اسلام (الترتيب ..) دلوقتي هتدعي عليه ، وتقولي يا عم إنت مش قلت كلمة Sort دي معناها ترتيب ..أيوا مش هنكر ..بس عشان تتضح الصورة كلمة Sort هنا فعل أو حدث Method ، أما كلمة Order تعتبر زي الاسم وممكن نقول إن البارامترات دي وصف لكيفية حدوث الحدث ، أي الطرق المؤدية لحدوث الحدث !! أنا تهت زيكم بالظبط
المهم المقصود منها نوعية الترتيب هنا (هل الترتيب تصاعدي أم تنازلي) ، وبردو كلمة Order جنبها رقم واحد (الحارس الشخصي) ..يليها نقطتين وعلامة يساوي ، وقيمتها إما xlAscending أو xlDescending (أظن مفهومة يا أخ اسلام)
ناخد فاصلة تانية وأوعدك دي تكون آخر فاصلة في السطر ده .. البارامتر الثالث هو المسمى Header ودي ترجمتها حقول البيانات أو عناوينها ..
نسأل هل للبيانات اللي موجودة عناوين ولا لا ؟؟ م ، والاسم ، والنوع (دي عناوين أو حقول للبيانات) .. الإجابة نعم xlYes
معلومة جديدة نستفيد منها إن الحدث Method قد يتبعه بارامترات ، وتأتي هذه البارامترات بعد الحدث Method بمسافة بينهما ، يعني اللي بيفصل بين الحدث والبارامترات هي المسافة (دي المحرم..) ..أما البارامترات فبيتم الفصل بين كل واحد وأخوه بفاصلة , .. حاجة تانية لما تلاقي النقطتين فوق بعض وبعدين علامة يساوي تعرف إن دا بارامتر .. يا رب تكون المعلومة مفيدة.
طيب سؤال من الأستاذ حسام : هل البيانات لازم يكون فيها عنوان عشان نعمل فرز ؟؟ جاوب إنت يا اسلام ، اسلام : يا أستاذ حسام طالما فيه بارامتر بيسأل هل فيه عنوان أو مفيش ، يبقا أكيد ممكن إننا نفرز من غير عناوين البيانات ..
الله ينور عليك يا سمسم ، وميحرمناش منك ، فعلا الكلام دا صحيح .. نشوف السطر ده بيأدي نفس الغرض ، استغنينا عن صف العناوين :
CODE
Range("A2:C20").Sort Key1:=Range("B2:B20"), Order1:=xlAscending, Header:=xlNo
النطاق بدأ من A2 بعيداً عن عناوين البيانات ، والمفتاح كمان بدأ من B2 ، ونخلي بالنا من قيمة البارامتر Header هنلاقيه xlNo (يعني مفيش عناوين).
*********************************
ننتقل لجزئية تانية .. الجزئية اللي فاتت أخدت حقها وزيادة ، دلوقتي واحد بيبص لي وبيقولي ايه شكل البيانات الملخبطة دي ..حد يفرز الأسماء ويخلي كله مع بعضه (ذكور مع إناث) دا إنت راجل محترم حتى عيب عليك !! ..ردي : أنا آسف والله يا حاج محمد مكانش قصدي ، دا كان مجرد مثال عموما عنيا ليك هنعيد ترتيبهم زي ما إنت عايز (حضرتك أكيد عايز الذكور أولا وبعدين الإناث ) ..رد وقال : كدا عين العقل ..
بسيطة يا حاج محمد : السطر الخاص بالفرز هنزود عليه مفتاح كمان ، وشكل لترتيب المفتاح الجديد ...
قبل ما أضع السطر ..عايزين نعود نفسنا إننا ندي نفسنا مساحة من التفكير قبل التنفيذ .. الفرز المرة دي هيكون على عمودين (مين قبل مين .. يعني عمود الاسم الأول ولا عمود النوع ؟؟ الإجابة بسيطة عمود النوع عشان نفصل بين الذكور والإناث : أي خدمة يا حاج محمد)
إذاً الفرز هكيون لعمود النوع (ذكر ، أثنى ) ، نبص في أول حرف في ذكر وأول حرف في أنثى (محدش يبص على كل الحروف عيب) أول حرف هو حرف الذال في كلمة ذكر ، وألف في كلمة أنثى : طيب الكلمتين دول الألف الأول ، بمعنى تاني لو تركنا الخيار xlAscending اللي هو الترتيب التصاعدي بكدا هيكون الإناث الأول وبعدين الذكور حسب الترتيب الأبجدي ، إذاً في الحالة دي هنكتب xlDescending (عشان تتم عملية الفرز ذكر ثم أنثى)
نأتي للتطبيق العملي : ها هو السطر ...
CODE
Range("A1:C20").Sort Key1:=Range("C1:C20"), Order1:=xlDescending, Key2:=Range("B1:B20"), Order2:=xlAscending, Header:=xlYes
هنشبه السطر دا بشقة ليها بابين : أقصد بالبابين عمودين الترتيب (عمود النوع ثم عمود الأسماء) ، كل باب له مفتاح عشان يفتح بيه ..
الباب الأول عمود النوع ومفتاحه رقم 1 ، وشكل ترتيبه أو نوع ترتيبه تنازلي (عمود النوع)
CODE
Key1:=Range("C1:C20"), Order1:=xlDescending
والباب التاني ومفتاحه رقم 2 ، وشكل أو نوع ترتيبه تصاعدي (عمود الأسماء)
CODE
Key2:=Range("B1:B20"), Order2:=xlAscending
طبعا المفتاح ده ميشتغلش على ده ، ولا ده يشتغل على ده ، إنما ده لده وده لده (معلش هيست شوية)
مفتاح النوع هيعتمد على النطاق C1:C20 ، ومفتاح الأسماء هيعتمد على النطاق B1:B20 ، كل مفتاح يلعب في ملعبه أقصد في بابه ، أقصد في العمود الخاص بيه.
وبكدا لما ننفذ السطر اللي فات ، نقدر نحصل على النتيجة التي ينتظرها الحاج محمد..
الحاجة أم محمد شكلها مكشر وزعلت وبتقول بالإنجليزي : Ladies First يا مان (معلش أصلها مثقفة حبتين)
أوك يا حاجة ولا تزعلي نفسك .. الفكرة بأبسط مما تتخيلي غيري كلمة واحدة ، وألا أقولك متتعبيش نفسك شيلي حرفين وحطي حرف واحد بس
شيلي حرفي De في كلمة Descending وحطي حرف الـ A (شفتي بقا إنها بسيطة .. متنسيش الفطير عشان مستر حسام)
يا للروعة !! الحاجة أم محمد مش مصدقة نفسها .عموما جربوا (مش تجربوا الكود .. جربوا فطير أم محمد هيعجبكم جداً ، وبعد ما تاكلوا وتتمتعوا بالفطير جربوا الكود بعد التعديل ..)
*********************************
ننتقل لجزئية أخيرة تهم نفس الموضوع ...ألا وهي ألا وهي (تصدقوا نسيت) افتكرت .. إزاي أخلي النطاق غير محدد أو ديناميكي ..
إحنا لما اتعاملنا مع النطاق حددنا النطاق لحد الصف رقم 20 في المثالين اللي فاتوا ....
عايزين يكون الكود مرن ، يعني يمشي مع أي عدد من الصفوف ، لأن قواعد البيانات معروف إنها مش ثابتة .. يبقا المطلوب الجديد إننا نخلي آخر صف مفتوح ، أو من خلال الكود نخلي محرر الأكواد هو اللي يحدد آخر صف مش إحنا ..
مستر حسام خطاب تناول (الفطيرة بتاعت أم محمد) وأيضاً تناول هذه النقطة في شرح رائع له ..
نشرحها تاني ..ونخلي بالنا ، وخلينا جد بقا شوية ومركزين أوي لأن الحتة دي تقريبا مفيش مبرمج بيستغنى عنها (آه والله زي ما بقولكم كدا)
نفرض دلوقتي إننا مش عارفين آخر صف ..نجيبه إزاي .. الإجاية نسجل ماكرو (واحد مبرق ومش فاهم أيوا هنسجل ماكرو ..بردو مبرق )
بص يا مبرق : ابدأ تسجيل و تعالى في العمود الأول A واقف بعيد تحت بعد البيانات بمسافة كبيرة وليكن مثلا A100 ، وبعدين اضغط Ctrl + سهم لفوق من لوحة الأسهم .بس خلااااص انتهى التسجيل ، نروح لمحرر الأكواد هنلاقي الشكل ده
CODE
Range("A100").Select
Selection.End(xlUp).Select
وممكن نختصره في سطر واحد بس إننا نشيل كلمة Selection ونحط مكانها النطاق
CODE
Range("A100").End(xlUp).Select
عايز تطبق الكود ده ، روح لأي خلية بعيدة في أي عمود واضغط Alt+F8 وشوف الماكرو اللي فيه السطر اللي فات اسمه ايه واضغط Run..
نفهم إزاي هنستغل الحتة دي في إننا نعرف آخر سطر به بيانات في العمود A .. نقطة البداية هي A100 ، والكلمة
CODE
End(xlUp)
دي لما ضغطنا Ctrl وسهم لفوق المحرر ترجمها كدا ، يعني اطلع لفوق Up يا سفن أب يا لذيذ يا رايق (ما هو لازم نهضم الفطير اللي أكلناه)
طيب واحد بيقولي بس دا مش حل لأني أساسا معرفش البيانات دي آخرها فين ، بلاش استعباط. هرد عليه وأقوله : الله يسامحك ، ما هو لو صبر القاتل ع المقتول كان مات لوحده ... إحنا هنخلي رقم الصف 100 هو آخر صف في ورقة العمل ، بالنسبة لـ 2003 آخر صف 65536 ، أما في 2007 فما فوق فعدد الصفوف 1048576 (يا دي الحيرة ..يعني نغير رقم 100 لأي رقم فيهم) ..اللي يحيرك طيره ، يعني لا هنستخدم الرقم ده ولا ده
إحنا هنخلي المحرر هو اللي يعد الصفوف كلها بالسطر ده ، سبق وشرحناه في النافذة الفورية
CODE
MsgBox Rows.Count
بس إحنا مش عايزينها في رسالة ..دا بس عشان تتضح الصورة ، كلمة Rows تعني صفوف يا أبو سليمان ، وكلمة Count يعني يا محرر اتفضل عد.
هكيون الناتج لتنفيذ السطر اللي فات مختلف حسب إصدار الأوفيس اللي عندك ، لو 2003 هيطلع الناتج 65536 ، ولو الأوفيس 2007 فما فوق هيطلع الناتج 1048576 (أكيد فيه ناس تاااهت مني .. الفطير عمل عمايله معاكم)
يرجع مرجوعنا لموضوعنا الأصلي عرفنا عدد الصفوف من خلال محرر الاكواد ، يبقا هنشيل رقم 100 ونحط Rows.Count وبس
CODE
Range("A" & Rows.Count).End(xlUp).Select
نخلي بالنا الرقم 100 كان داخل أقواس التنصيص ، لكن لما استخدمنا الجملة Rows.Count الأقواس طردتها براها ، لأنها الأقواس مش بتقبل المتغير ، وعدد الصفوف هنا يا أحباب وركزوا متغير حسب الإصدار ، لكنها بردو حنينه مهانش عليها تطرده قامت حضنته بعلامة & عشان يكون جنبها
طيب نرجع تاني للهدف من دا كله إننا نعرف رقم آخر صف فيه بيانات ، إحنا بالسطر الأخير عرفنا نحدده لكن إزاي نعرف رقم صفه .. هنشيل Select ونحط Row وبس .. لا محدش يقولي بس !! كدا السطر دا بالشكل ده
CODE
Range("A" & Rows.Count).End(xlUp).Row
لو نفذت السطر ده هيقولك محرر الأكواد يا أهبل ايه ده ويطلع لك رسالة خطأ Invalid Use استخدام خاطيء..
السطر صحيح ، بس السطر عبارة عن رقم (اللي هو رقم الصف الأخير اللي فيه بيانات) بس الرقم دا مينفعش يقف لوحده يخاف ياخد برد .. لازم نحط الرقم ده في متغير ..
CODE
Dim LR As Long
LR = Range("A" & Rows.Count).End(xlUp).Row
MsgBox LR
عملنا متغير باسم LR ودي اختصار Last Row أو الصف الأخير (بس التسمية اختياري يا شباب)
ووضعنا قيمة للمتغير اللي سميناه LR في السطر الثاني ، فأصبح المتغير LR يحمل الآن رقم الصف الأخير
وفي السطر الثالث عشان نختبر مدى صحة الكود ونشوف النتيجة عملنا رسالة يظهر فيها قيمة المتغير ..
** ملحوظة هامة : ممكن السطر الثاني نستخدم كلمة Cells بدلاً من كلمة Range بس هيكون التركيب مختلفة شوية ، لأن مع كلمة Cells بيكون فيه جزئين : الجزء الأول رقم الصف والجزء الثاني رقم العمود ، معنى الكلام ده إن Cells بتتعامل مع أرقام ، فيكون شكل الكود اللي فات لو استخدمنا Cells بهذا الشكل :
CODE
Dim LR As Long
LR = Cells(Rows.Count, 1).End(xlUp).Row
MsgBox LR
طبعاً Rows.Count تمثل رقم آخر صف به بيانات ، ورقم واحد بيمثل رقم العمود الأول A
>>>>>
نفذ الكود سواء اللي فات أو اللي قبله !! هنلاقي رقم الصف الأخير طلع في رسالة (أنا طلعت عيني وأكيد إنتو كمان .. يعني اللفة الطويلة دي عشان نعرف رقم آخر صف به بيانات.)
دلوقتي جه الوقت إني أودعكم .. نشوف شكل الكود في النهاية هيكون عامل إزاي
CODE
Sub SortData()
Dim LR As Long
LR = Range("A" & Rows.Count).End(xlUp).Row
Range("A1:C" & LR).Sort Key1:=Range("C1:C" & LR), Order1:=xlDescending, Key2:=Range("B1:B" & LR), Order2:=xlAscending, Header:=xlYes
End Sub
دا الكود اللي هيرتب الذكور ثم الإناث ، وبعدين يرتب الأسماء ، في النطاق اللي بيبدأ من A1:C ورقم آخر صف ..لاحظ إننا شلنا رقم 20 من الكود الأصلي اللي شرحناه من بدري ، واستبدلناه بالمتغير LR والذي يحمل قيمة رقم آخر صف...!!
لتجربة الكود أضف اسماً جديدا ونفذ الكود مرة أخرى ستجد أن الاسم الجديد قد انتقل لترتيبه ، وإلى هنا توقفت دماغي (فااااااااااااااصل ومفيش نواصل)
أرجو أن أكون قد وفقت في توصيل المعلومة ، وإلى أن نلتقي أترككم في رعاية الله.
كان معكم الحاجة أم محمد صاحبة الفطير من منتدى أكاديمية الصقر 
تقبلوا تحياتي ودمتم بود 
الحلقة الثالثة عشر مهارات الفرز والترتيب
