logo

لوحة التميز الأسبوعي
العضو المتميز المشرف المتميز المراقب المتميز المدير المتميز الموضوع المتميز القسم المتميز
العضو المتميز المشرف المتميز المراقب المتميز المدير المتميز الموضوع المتميز القسم المتميز
Hatem Eissa hassona229-- لا تميز خلال هذه الفترة لا تميز خلال هذه الفترة لا تميز خلال هذه الفترة اكسيل مشاريع جاهزه



أهلا وسهلا بك زائرنا الكريم في أكاديمية الصقر للتدريب، لكي تتمكن من المشاركة ومشاهدة جميع أقسام المنتدى وكافة الميزات ، يجب عليك إنشاء حساب جديد بالتسجيل بالضغط هنا أو تسجيل الدخول اضغط هنا إذا كنت عضواً .





06-02-2018 10:15 مساءً
معلومات الكاتب ▼
تاريخ الإنضمام : 03-10-2017
رقم العضوية : 852
المشاركات : 1580
الدولة : مصر
الجنس :
تاريخ الميلاد : 1-9-1995
الدعوات : 5
قوة السمعة : 10861
الاعجاب : 6
موقعي : زيارة موقعي
السلام عليكم ورحمة الله وبركاته
الحلقه الثانيه من دروس الـVBA للاستاذ الكبير ياسر خليل

.....................................................................................................................
ونبدأ حلقة جديدة من حلقات مسلسل افتح الباب يا عبد التواب ..
اتعلمنا المرة اللي فاتت إزاي ندخل على محرر الأكواد وإزاي نضيف كود واتعرفنا على نافذة المشروع ..
دلوقتي جه الوقت اللي لازم تعرف فيه الهيكلة العامة للتعامل مع الأكواد .. يعني ايه ؟
هضرب مثال ليتضح المقال :
أنا ساكن في عمارة كبيرة (العمارة زي تطبيق الإكسيل Application) دي العمارة بتاعتنا
وساكن في شقة فيها (الشقة دي هي WorkBook المصنف يعني ..
والشقة عندي فيها 3 أوض (أوضة 1 - أوضة 2 - أوضة 3 ) دي زي أوراق العمل اللي عندنا Sheet1 و Sheet2 و Sheet3
جوا كل أوضة فيه مجموعة أشياء أو بنسميها كائنات Objects بس حاجات صغيرة.. مثلا فيه تلاجة .. والتلاجة طبعا واخدة حيز من الفراغ بنسميه نطاق Range يعني النطاق ده جوا الأوضة اللي جوا الشقة اللي في العمارة
يبقا ممكن نبرمج التلاجة : أيوا صحيح !!
هنحدد مكانها ..
CODE
عمارة.شقة.أوضة(1).تلاجة.فتح

بالإكسيل تكون بالشكل ده :
CODE
Application.ThisWorkbook.Sheets(1).Range("A1").Select

بكدا نكون عرفنا هيكلة الكائنات الموجودة عندنا Objects ..
في السطر اللي فات بدأنا بالعمارة أقصد التطبيق متبوعاً بنقطة Period ثم حددنا الشقة أقصد المصنف Workbook وهنا أشرنا للمصنف الحالي ThisWorkbook، وبعدين حددنا الأوضة اللي هي الشيت Sheets (1) ثم أخيرا التلاجة أقصد النطاق المراد العمل عليه وهو هنا الخلية A1 بهذا الشكل Range("A1) .
>>> وأخيرا .. بعدما وصلنا للتلاجة هنعمل ايه ؟ أكيد هنفتحها عشان نشوف أي حاجة نشربها بعد الكلام الكتير ده الواحد ريقه نشف اللي يبل ريقكم .. أيوا نفتح دا فعل والفعل في اللغة العربية نعرفه إزاي .. لما نحط قبليه كلمة (أن) يعني لو قلنا (أن يفتح) كدا فيه معنى واضح .. أما لو قلنا كلمة حجم وحطينا قبليها (أن حجم) دي ملهاش معنى ، فبالتالي كلمة يفتح فعل أما كلمة حجم فدي اسم أو صفة (كدا معلمي اللغة العربية هيبلغوا عني إني بدي دروس في العربي) !!

يرجع مرجوعنا لموضوعنا إحنا ليه شرحنا الفعل لأن الفعل في البرمجة بيساوي كلمة Method يعني لما نشوف كلمة Method دي نربطها بحدث الفعل
CODE
تلاجة.فتح


يعني لو جربنا السطر اللي فات ووقفنا في خلية بعيدة شوية ونفذنا الكود هيحدد الخلية A1 .. مبروك عليكم السطر الأول من الأكواد
الفعل هنا أو الـ Method اسمه Select وترجمتها حدد .. أي أننا قمنا بالإشارة لكل الكائنات وصولا إلى الخلية A1 ثم نأمر الكود بتحديد النطاق.
ناخد مثال مهم أوي عشان نفهم الـ Method بشكل أكبر
CODE
Application.Quit

هنا لما اكتب الكائن Application وبعدين أكتب النقطة هلاحظ حاجة في غاية الأهمية .. ايه هيا؟
محرر الأكواد بيقدم مساعدة لينا (ودي عشان الجماعة اللي بيقولوا المشكلة في اللغة .. خلوا بالكم) بيظهر لنا قايمة شبه القايمة المنسدلة بس مش منسدلة فيها كلمات كتيرة ..
MjIyNTM2MQ3535810151805
وهنلاقي شكلين : الشكل الأول عمنا بيل جيتس بيشاور بصبعه على ورقة والشكل التاني علامة شبه الطوبة الخضرا ..
Mzc1NTE2MQ8686405942574
الشكل الأول بنسمية الخاصية Property وهنشرحها بالتفصيل كمان شوية ، والشكل التاني الطوبة الخضرا ربنا يجعل حياتكم خضرا ومزهزهة هي دي الـ Method أو الفعل
طيب هعرف إزاي إذا كانت كلمة Quit دي Method ولا Proerty ببساطة بص على شكلها هتلاقي علامة الطوبة الخضرا اللي قلنا عليها يعني كلمة Quit دي Method
وطبعا الحتة اللي فاتت للجماعة اللي مش بيعرفوا إنجليزي زي حالاتي ، أما بالنسبة للي بيعرفوا إنجليزي فيبصوا لكلمة Quit هيلاقوا معناها اخرج ودا فعل يعني Method>
يبقا خلاصة الكلام السطر اللي فات بيعطي أمر للخروج من التطبيق.


نقطة تانية في غاية الأهمية لما نلاقي نفسنا مش عارفين حروف الكلمة اللي بنكتبها .. بعد النقطة ولما تظهر القايمة بكتب أول حرف أو حرفين في الكلمة اللي أنا عايزها ، وبعدينباستخدام الأسهم فوق وتحت أقف على الكلمة اللي عليها العين والنن واضغط TAB من لوحة المفاتيح اللي تحت حرف الذال يا رجالة (أنا عارف إن فيه ناس هتدور دلوقتي على حرف الذال ومش هتلاقيه . بصوا في لوحة المفاتيح أيوا بصوا .. فوق شمال فوق شمال فوق شمال تحت زر Esc هتلاقي حرف الذال ، وتحت الذال هتلاقي Tab عليها سهمين سهم متجه لليسار وآخر لليمين .. لو ملقتش السهمين قوم حالا رجع لوحة المفاتيح للراجل اللي إنت اشتريت منه دا نصب عليك) المهم لما نضغط Tab هنلاقي الكلمة اتكتبت لوحدها .. يا سلام ونعم الكلام ونعم المساعدة شكرا يا بيل !!


ممكن أريح ايدي شوية عشان والله ايدي تعبت !!!
----------------------------------------------
طيب دي الـ Method فيه حاجة تانية اسمها Property ودي ترجمتها خاصية (وتشمل زي ما قلنا الاسم أو الصفة)
CODE
تلاجة.حجم



حجم دي هي خاصية التلاجة Property فلو حبينا نضع قيمة لحجم التلاجة
CODE
تلاجة.حجم = 10 قدم



نلاحظ إن الخاصية ليها قيمة وعشان نضع قيمة ليها بنحط علامة يساوي متبوعة بقيمتها
ناخد مثال على الخاصية Property عشان عارف إنتو تهتو مني ... ركزوا يا شباب!
CODE
Application.Caption= "alsaqr"

طبعا إحنا عارفين شريط العنوان بيكون فيه اسم الملف أو المصنف متبوعا بشرطة - وبعدين اسم التطبيق Excel
طيب لو حبينا نخليه باسم منتدانا الحبيب يبقا ننفذ السطر اللي فوق
الكلمة اللي جات ورا Application اللي هي كلمة Captionدي خاصية من خواص التطبيق مش فعل يا مستر حمدي .. وطالما إنها خاصية فبنحدد ليها قيمة بعلامة يساوي (واحد هيعمل فيها مركز طيب إحنا نسينا علامة يساوي مع Quit أقولك الفعل مش بيتحدد له قيمة ، القيمة بتكون مع الخاصية أو الاسم أما الفعل له حاجات تانية اسمها بارامترات .. متخرجنا برا الموضوع)
المهم بنحدد قيمة للخاصية وليكن مثلا كلمة alsaqr وطبعا دي نص ، وعرفنا من المرة اللي فاتت إن النصوص توضع بين أقواص تنصيص " " .. اللي مش عارف يرجع يراجع من الأول أنا مش بحب أكرر المعلومة أكتر من 100 مرة ..
لو نفذنا بقا السطر اللي فات هنلاقي شريط العنوان اتغير (يا حلااااااااوة)


واحد هيقولي طيب إزاي نكتب الأسطر اللي إنت نازل دش فيها أقولك فيه قايمة اسمها Insert اختار منها Module أو فيه علامة في شريط الأدوات جنب علامة الإكسيل على يمينها علطول اختار منها Module
,وضع فيها الأسطر المراد تنفيذها يرجى مراعاة حاجتين الأسطر مبتكونش عريانة كدا لازم نغطيها بلحاف وبطانية يعني اللحاف Sub وبعدين اسم الإجراء ، والبطانية End Sub
ونحاول عشان نقدر نتعلم صح نبص كويس قبل تنفيذ الكود وبعده
يعني في المثال الأخير بص لشريط العنوان هتلاقي Excel مشرف في العنوان ، وبعد تنفيذ الكود هتلاقي alsaqr هي اللي نورت ...


وإلى لقاء في حلقة جديدة من حلقات افتح الباب
أسأل المولى عزوجل أن ينفع بهذا الرغي جموع المسلمين وأن يكون شاهدا لي لا علي ..
 
 





look/images/icons/i1.gif الحلقة الثانية الهيكلة العامة للكود
  06-02-2018 11:35 مساءً   [1]
معلومات الكاتب ▼
تاريخ الإنضمام : 21-08-2017
رقم العضوية : 3
المشاركات : 10529
الجنس :
تاريخ الميلاد : 1-10-1978
الدعوات : 24
قوة السمعة : 36759
الاعجاب : 186
جزاك الله خيراً أخي الحبيب إسلام على إعادة نشر هذه الحلقات ، وأتمنى أن تفيد أعضاء المنتدى إن شاء الله
تقبل وافر تقديري واحترامي




look/images/icons/i1.gif الحلقة الثانية الهيكلة العامة للكود
  07-02-2018 10:42 مساءً   [2]
معلومات الكاتب ▼
تاريخ الإنضمام : 22-08-2017
رقم العضوية : 18
المشاركات : 350
الجنس :
تاريخ الميلاد : 7-7-1979
الدعوات : 1
قوة السمعة : 939
الاعجاب : 2
جزاكم الله خيرا




look/images/icons/i1.gif الحلقة الثانية الهيكلة العامة للكود
  08-02-2018 01:59 مساءً   [3]
معلومات الكاتب ▼
تاريخ الإنضمام : 11-01-2018
رقم العضوية : 3536
المشاركات : 132
الجنس :
تاريخ الميلاد : 31-12-1988
الدعوات : 3
قوة السمعة : 199
الاعجاب : 0
شرح مبسط ومفيد
جعله الله فى ميزان حساناتك




look/images/icons/i1.gif الحلقة الثانية الهيكلة العامة للكود
  09-12-2018 03:22 مساءً   [4]
معلومات الكاتب ▼
تاريخ الإنضمام : 22-11-2018
رقم العضوية : 9298
المشاركات : 119
الجنس :
تاريخ الميلاد : 27-6-1985
قوة السمعة : 110
الاعجاب : 0
جزاك الله خيرا




اضافة رد جديد اضافة موضوع جديد




الكلمات الدلالية
الحلقة ، الثانية ،









اخلاء مسئولية: يخلى منتدى أكاديمية الصقر للتدريب مسئوليته عن اى مواضيع او مشاركات تندرج داخل الموقع ويحثكم على التواصل معنا ان كانت هناك اى إنتهاكات تتضمن اى انتهاك لحقوق الملكية الفكرية او الادبية لاى جهة - بالتواصل معنا من خلال نموذج مراسلة الإدارة .وسيتم اتخاذ الاجراءات اللازمة.
سياسة النشر: التعليقات المنشورة لا تعبر عن رأي منتدى أكاديمية الصقر للتدريب ولا نتحمل أي مسؤولية قانونية حيال ذلك ويتحمل كاتبها مسؤولية النشر.

الساعة الآن 12:10 AM