السلام عليكم ورحمة الله وبركاته

بعد طول غياب عن الأحباب ، أقدم لكم موضوع خفيف دمه ظريف .. ألا وهو كيفية إدراج رموز من خلالة خريطة الرموز
في العنوان الرموز لا تعني رموز خاصة فقط إنما تعني كل الرموز التي تخطر ببالك ... كله موجود على الخريطة (عشان منحرمش معلمي الدراسات من المشاركة في الإكسيل)
الخريطة دي لا تخص الإكسيل فحسب ، بل هي خريطة موجودة في نظام الويندوز لديك .. عشان تتأكد من كلامي روح لقايمة Start وفي صندوق البحث اكتب char هتلاقي في نتايج البحث Character Map



افتح الخريطة وشوف الرمز اللي على مزاجك (أنا مثلاً اختر الرمز Registered Mark العلامة المسجلة >> عشان أنا احتمال كبير أكون مسجل خطر أو علامة مسجلة)
خلي الصور تتكلم ، فربما صورة أفضل من ألف كلمة (حكمة اليوم)



** بالمناسبة قبل ما أكمل الموضوع دا جه بدون ترتيب لما شفت مشاركة لأخ اسمه حسام الدين على الفيس بوك ، لما شفته منزل بوست فيه تلميح إزاي ندرج علامة التربيع والتكعيب ، فقلت نعمم المعلومة عشان تكون أشمل وأعم ، ودي مشاركته

بعد ما فتحنا الخريطة نختار الرمز اللي إحنا عايزينه
لو بصينا في الخريطة في الجزء السفلي منها ناحية اليمين (خريطة بقا ولازم أوصف الاتجاهات عشان متوهش مني)
هنلاقي Keystroke : Alt + 0174 (يا سلام: أهو دا بالظبط اللي شرحه حسام الدين - بس دا رمز تاني)

كدا عرفنا الموضوع إزاي بيتم بشكل يدوي ..

نيجي لنقطة جديدة وأخيرة : إزاي بالأكواد ندرج الرمز المطلوب ؟! (سؤال من طالب نجيب بس مش اسمه نجيب)
الموضوع بسيط هنستخدم دالة اسمها ChrW والمعامل الخاص بالدالة دي هيكون كود تاني غير اتعرفنا عليه دلوقتي ( 0174 ) ..

نرجع تاني نبص في الخريطة بس المرة دي في الجزء السفلي ناحية الشمال هنلاقي U+00AE >> دلوقتي هنشيل حرف الـ U وعلامة الزائد ونحط مكانهم علامة & ثم حرف الـ H ، فيصبح الكود الخاص بالرمز ده هو

&amp;H00AE<br />

ممكن تجرب الكود دا بنفسك وتجرب رموز تانية وعيش ..

Sub Test()
    Range("A1").Value = ChrW("&H00AE")
End Sub

الشكر موصول للأخ حسام الدين الذي ألهمني بهذا الموضوع البسيط ، فله جزيل الشكر

وفي نهاية الموضوع أسألكم الدعاء (وليس التعزية) لوالد زوجتي الذي وافته المنية منذ أسبوعين ، فلهذا الرجل معزة في قلبي لا يعلمها سوى الله ، فأسأل الله العظيم أن يغفر له ويرحمه ويرزقه الفردوس الأعلى من الجنة

إعداد وتقديم / ياسر خليل أبو البراء